Skuadra e Llapit ka fituar ndeshjen e dytë kontrolluese në kuadër të fazës përgatitore që po zhvillohet në Antalya të Turqisë ndaj skuadrës Akademija Pandev me rezultat të pastër, 2-0. Golat e fitores erdhën në pjesën e dytë.

Për dhjetë minuta Llapjanët krijuan avantazh prej dy golave (74′, 84′) me anë të Shillovës e Fazliut që u asistuan nga Peposhi e Maliqi.

Goli i parë erdhi pas depërtimit të bukur në zonë nga mbrojtësi i majtë, Ardit Peposhi i cili krosoi në zonë dhe më së miri u gjend aty Alban Shillova i cili me kokë realizoi për 1-0 (74′), përcjell arbresh.info.

Me shënimin e golit të parë Llapi fitoi vetëbesimin e duhur dhe pas saktësisht 10 minutave arriti ta gjej edhe golin e dytë e të qetësisë me anë të Drilon Fazliut i cili u shërbye mjaft mirë në zonë nga e majta, aty ku Adem Maliqi depërtoi në mesin e 4-5 futbollistëve kundërshtarë (84′).

Trajneri Tahir Batatina u dha hapësirë të gjithë futbollistëve, përveç Sh. Shabanit, Hamdiut e Llapashticës që u pushuan për këtë ndeshje.

Llapi nesër do të zhvilloj ndeshjen e radhës kontrolluese ndaj Neftchy Fergana, e cila nis në ora 15:00 sipas kohës lokale në Turqi. / arbresh.info/